දිඹුලාගල ප්‍රාදේශිය සභාව

දිඹුලාගල ප්‍රාදේශීය සභාවේ කැපවූ සේවයට ගෞරවාන්විත සැමරුම 🌿

දිඹුලාගල ප්‍රාදේශීය සභාවේ වගකීම් භාරගෙන සමාජ හිතවාදී සේවාවන්හි පුරෝගාමී ලෙස කැපවී කටයුතු කළ නිලධාරීනියන් දෙපලකගේ විශිෂ්ට සේවාව අගය කරමින් විශේෂ ගෞරවාන්විත සැමරුම් හමුවක් 2026.03.23 දින සභාපතිතුමන්ගේ ප්‍රධානත්වයෙන්, උප සභාපතිතුමන්, ප්‍රාදේශීය සභා මන්ත්‍රීතුමන්, ලේකම්තුමන් සහ සභාවේ සියලු කාර්ය මණ්ඩල සාමාජිකයින්ගේ සහභාගීත්වයෙන් උත්සවාකාරයෙන් පැවැත්වුණි.

මෙම අවස්ථාව දිඹුලාගල ප්‍රාදේශීය සභාවේ සේවයට කැපවූ නිලධාරීන්ගේ ඉමහත් දායකත්වය හා වගකීම්භාරීත්වය අගය කරමින්, ඔවුන් විසින් දිගු කාලයක් පුරා ජනතා සේවය වෙනුවෙන් ඉටු කළ අගනා මෙහෙවරට කෘතඥතාව පිරිනැමීමට උත්සාහ කළ විශේෂ අවස්ථාවක් විය. සභාවේ සංවර්ධන කටයුතු, පරිපාලන කටයුතු හා ජනතා සේවාවන් ශක්තිමත් කිරීමේදී ඔවුන් ඉටු කළ භූමිකාව මෙහිදී විශේෂයෙන් සිහිපත් කරන ලදි.

දිඹුලාගල ප්‍රාදේශීය සභාවේ ආයතන අංශයේ විශිෂ්ට සේවාව ඉටු කළ ජී.ආර්. ඕෂධී ඩිල්රුක්ෂි මහත්මිය සහ ගිණුම් අංශයෙහි සේවය කළ ඒ.එම්.එන්.එස්. අත්තනායක මහත්මිය නව සේවා ස්ථාන වෙත පත්ව යාම සනිටුහන් කරමින්, ඔවුන් විසින් සභාවේ වගකීම් ඉටු කරමින් දැක්වූ වෘත්තීයභාවය, කැපවීම සහ සමාජහිතකාමී සේවය මෙම අවස්ථාවේදී උසස් ලෙස අගය කරන ලදි.

එමෙන්ම ඔවුන්ගේ සේවය සනිටුහන් කිරීම සඳහා සභාපතිතුමන්ගේ සහභාගීත්වයෙන් ත්‍යාග පිරිනැමීම සිදු කරන ලදී. මෙම උත්සවය සභාවේ එකමුතුභාවය, කෘතඥතාව හා සේවක අගය කිරීමේ සංස්කෘතිය පෙන්වා දෙන වැදගත් අවස්ථාවක් ලෙස සටහන් විය.

ඔවුන්ගේ අනාගත සේවා කටයුතු සඳහා දිඹුලාගල ප්‍රාදේශීය සභාවෙන් හෘදයාංගම සුභාශිංසන පිරිනමන අතර, ඔවුන් විසින් ඉටු කළ සේවය සදා මතකයේ රැඳෙනු ඇත. 🌼