දළුකාන වැව

“මාසෙට පොතක්” සාහිත්‍ය හමුව සාර්ථකව නිමාවට පත් විය!

දිඹුලාගල ප්‍රාදේශීය සභා මහජන පුස්තකාලය විසින් අඛණ්ඩව සංවිධානය කරනු ලබන “

මාසෙට පොතක්” සාහිත්‍ය වැඩසටහන යටතේ, මෙවර සාහිත්‍ය හමුව අද දින දළුකාන වැව අද්දර පිහිටි දිඹුලාගල ප්‍රාදේශීය සභා සංචාරක කලාපයේදී ඉතා සාර්ථක අන්දමින් පැවැත්විණි.

මෙවර සාහිත්‍ය විචාරයට තෝරාගෙන තිබුණේ ප්‍රවීණ ලේඛක රුවන් බන්දුජීව මහතාගේ “මීලඟ මීවිත” සාහිත්‍ය කෘතියයි. ජීවිතය, මනුෂ්‍යත්වය, සොබාදහම සහ සමාජය පිළිබඳ ගැඹුරු අර්ථයන් රැගත් මෙම කෘතිය, සහභාගී වූ සියලු දෙනාගේ සිත් ගැඹුරින් ස්පර්ශ කළ නිර්මාණයක් බවට පත්විය.

සාහිත්‍ය විචාරක දිලිප් මදුසංක (An Amazing Reader) මහතා විසින් ඉදිරිපත් කළ විචාරය හරහා කෘතියේ අන්තර්ගතය, චරිත නිරූපණය, භාෂා භාවිතය, සංකේතාත්මක අදහස් සහ ලේඛකයාගේ සුවිශේෂී නිර්මාණාත්මක දැක්ම පිළිබඳ ඉතා ගැඹුරු හා අර්ථවත් සංවාදයක් ගොඩනැඟිණි. සහභාගී වූ සාහිත්‍ය ලෝලීන්ගේ අදහස් හා ප්‍රශ්න හුවමාරුව මෙම හමුව තවත් සජීවී හා අර්ථවත් කළේය.

වැව් ඉවුරේ නිස්කලංක පරිසරය, සන්ධ්‍යා සුළඟේ සැනසුම, පොත්වල සුවඳ සහ සාහිත්‍යයට ආදරය කරන මිනිසුන්ගේ එකමුතුව එක්වූ මෙම අවස්ථාව, පොතක් පිළිබඳ සාකච්ඡාවකට පමණක් සීමා නොවී කියවීමේ සංස්කෘතිය ප්‍රවර්ධනය කරන, සිතන සමාජයක් ගොඩනඟන සහ අර්ථවත් සංවාදයන් බිහි කරන සුවිශේෂී සංස්කෘතික හමුවක් බවට පත් විය.

මෙම වැඩසටහන සඳහා සහභාගී වී එය වර්ණවත් කළ සියලුම සාහිත්‍ය ලෝලීන්ටත්, ගෞරවනීය දේශක දිලිප් මදුසංක මහතාටත්, කෘතියේ කර්තෘ රුවන් බන්දුජීව මහතාටත්, වැඩසටහන සාර්ථක කර ගැනීම සඳහා කැපවීමෙන් කටයුතු කළ සියලුම නිලධාරීන් සහ සංවිධායක මණ්ඩලයටත් දිඹුලාගල ප්‍රාදේශීය සභා මහජන පුස්තකාලයේ හෘදයාංගම ස්තුතිය පුද කරමු.